2022-ci il Azərbaycanda “Şuşa İli” elan edilib. Bununla bağlı Prezident İlham Əliyev yanvarın 5-də sərəncam imzalayıb.
Bu il 270 illiyini qeyd olunacaq Şuşa şəhərinin təməli Qarabağ xanı Pənahəli xan tərəfindən qoyulub.
Strateji mövqeyi ilə seçilən Şuşa Azərbaycana qarşı hərbi təcavüzə başlamış Ermənistan tərəfindən 1992-ci il mayın 8-də işğala məruz qalmışdır. İşğal dövründə şəhərdəki tarix və mədəniyyət abidələri vandalizm aktları nəticəsində dağıdılmışdır.
44 günlük Vətən müharibəsi nəticəsində Şuşa şəhəri 2020-ci il noyabrın 8-də işğaldan azad edilib. Həmin gün ölkədə Zəfər Günü kimi qeyd olunur.
Müharibədən sonra Şuşada infrastrukturun qurulması ilə yanaşı, tarixi abidələrinin bərpasına başlanılıb, Şuşa Şəhəri Dövlət Qoruğu İdarəsi yaradılıb.
Eyni zamanda Şuşa Azərbaycanın mədəniyyət paytaxtı elan edilib.
