Azərbaycanda 2022-ci il üçün iş vaxtı norması və istehsalat təqvimi təsdiq edilib. Bu barədə 17 dekabrda Əmək və Əhalinin Sosial Müdafiəsi Nazirliyinin saytında məlumat verilib.
2022-ci ildə beşgünlük iş həftəsində 241 iş günü, iş günü hesab edilməyən 104 istirahət günü, iş günü hesab edilməyən 19 bayram və 1 Ümumxalq Hüzn günü olacaq.
Gündəlik normal iş vaxtının müddəti 8 saat, həftəlik normal iş vaxtının müddəti isə 40 saat olacaq. 2022-ci il üçün 40 saatlıq iş həftəsində iş vaxtının illik norması 1921 saat kimi müəyyənləşdirilib.
Altıgünlük iş həftəsi tətbiq edilərkən həftəlik norma 40 saat olduqda gündəlik iş vaxtının müddəti 7 saatdan çox ola bilməz. Həmçinin səhərisi gün istirahət günü olan iş gününün müddəti isə 6 saatdan artıq ola bilməz.
