2021-ci ilin yanvar ayında dizelin qiyməti 33% bahalaşaraq 1 litr üçün 60 qəpikdən 80 qəpiyə qalxmışdır. Qiymət artımı ictimai nəqliyyat üzrə daşıyıcı şirkətlərə çətinlik yaradıb. Bu səbəbdən 30-a yaxın sərnişindaşıma ilə məşğul olan şirkət rəhbərləri iqtisadiyyat naziri Mikayıl Cabbarova müraciət edib. Məsələ ilə bağlı Qafqazinfo.az saytı 17 sentyabr tarixində məlumat verib.
Müraciətdə bildirilir ki, dizel yanacağının qiymət artımının sərnişindaşıma ilə məşğul olan sahibkarlıq subyektlərinə mənfi təsirini azaltmaq üçün İqtisadiyyat Nazirliyi tərəfindən kompensasiyanın (subsidiyanın) ödənilməsi nəzərdə tutulub. Lakin 9 ay müddətində hər hansı bir daşıyıcı şirkətə subsidiya ödənilməyib.
Həmçinin müraciətdə qeyd olunub ki, Bakıda sərnişindaşıma ilə məşğul olan 2200-dən çox avtobusun 70%-ə qədəri dizel yanacağı ilə işləyir. Bu sahədə minlərlə işçi qüvvəsinin fəaliyyət göstərdiyini nəzərə alaraq, şirkət rəhbərləri Mikayıl Cabbarovdan subsidiyanın ödənilməsini xahiş ediblər.
