Ağdam Azərbaycanda əhalisinin sayına görə 4-cü böyük şəhərə çevriləcək. Bu haqda Prezidentin xüsusi nümayəndəsi Emin Hüseynov dekabrın 9-da məlumat verib.
Məlumata əsasən, 2040-cı ilədək Ağdamın coğrafi əhatəsi 3 dəfəyə yaxın artacaq. Şəhərin əhalisi 100 min nəfər təşkil edəcək.
“Ağdamda əhalinin orta sıxlığı bir hektara təxminən 57 nəfər nəzərdə tutulub. Müqayisə üçün deyək ki, məsələn Sumqayıt şəhərində bir hektara 230 nəfər adam sayı düşür. Amma Gəncədə orta sıxlıq bir hektara 61 nəfərdir. Ağdam öz müasirliyi və urbanizasiya səviyyəsinə görə, simasına görə daha çox müasir şəhər təəssüratı yaradacaq. O, Sumqayıtla Bakı və Gəncə arasında bir simbioz təşkil edəcək”, - deyə nümayəndə vurğulayıb.
Onun sözlərinə əsasən, şəhərin baş planının üzərində yerli memarlar və xarici ölkələrin layihələndirmə institutları birgə çalışıblar. Şəhərdə 4 meşə massivi, 23 şəhərtipli park, həmçinin avtobus, piyada və velosiped yolları olacaq.
“Biz Fərhadın heykəlini, Dram Teatrını, məşhur çay evini, Ağdam bazarını bərpa etmək istəyirik”, - deyə E. Hüseynov qeyd edib.
