Ağdam Sənaye Parkına 100 milyon manatlıq investisiyanın yatırılması gözlənilir. Bunu Report 10 dekabr tarixində İqtisadi Zonaların İnkişafı Agentliyinin sədri vəzifəsini icra edən Elşad Nuriyevə istinadən məlumat verib.
“Ağdam Sənaye Parkında müxtəlif çeşidli sintetik xalça istehsalı, uniforma, polimer məhsulların istehsalı, günəş enerjisi ilə qidalanan işıq dirəkləri və digər sahələr üzrə ümumi 5 potensial layihəyə baxılır", - deyə Elşad Nuriyev keçirilən konfransda bildirib.
O, həmçinin qeyd edib ki, sözügedən layihələr üzrə 1 100-dən çox yeni iş yerinin yaradılması nəzərdə tutulur. Onun sözlərinə görə, sənaye parkının işıqlandırılmasında günəş enerjisindən qidalanan panellərdən istifadə edilir.
“Bundan əlavə sənaye parkının ərazisində "Kapital Bank"ın bankomatı quraşdırılıb", - nümayəndə söyləyib.
Elşad Nuriyev bildirib ki, Ağdam Sənaye Parkına ilkin mərhələdə 20-25 milyon manatlıq, ümumiyyətlə isə 100 milyon manatlıq investisiya yatırılması gözlənilir.
Ağdam Sənaye Parkı 2021-ci ilin may ayında yaradılıb.
