Ağdam və Füzuli rayonlarında “Azərsu” ASC-nin əməkdaşları xidməti vəzifələrini yerinə yetirərkən təhqir və fiziki təzyiqlə üzləşiblər. Bu barədə qurumun açıqlamasında məlumat verilib.
Ağdam rayonu Quzanlı qəsəbəsində yaşayan vətəndaşların debitor borcları yaranıb. Həmin abonentlərlə fərdi söhbətlər aparılsa da, ödəniş etməyiblər. Qurumun əməkdaşı borc ödənilməyəcəyi təqdirdə suyun kəsiləcəyini söyləyərkən həmin abonentlər tərəfindən fiziki təzyiqlərə məruz qalıb.
Füzuli rayonunun Horadiz şəhərində isə yerli sukanal idarəsinin əməkdaşı abonentin ağır təhqirlərinə məruz qalıb. Şəhər sakini borcunu ödəməkdən imtina edib və onunla aparılan maarifləndirici söhbət xoşagəlməz sonluqla nəticələnib. Hər iki faktın araşdırılması üçün hüquq-mühafizə orqanlarına müraciət olunub.
“Azərsu” ASC-dən bildirilib ki, yaranmış debitor borcların hissəli ödənişinə şərait yaradılır: “Bunun üçün abonent yerli sukanal idarəsinə müraciət edə və borcunu hissə-hissə ödəyə bilər”.
Bundan öncə, dekabrın 9-da Ağdamda “Azərişıq” ASC-nin iki əməkdaşı bıçaqlanmışdır.
