Ağdam şəhərində 15 min nəfərlik stadion tikiləcək. Bu barədə Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynova istinadən 3 yanvar tarixində Azərtac məlumat verib.
Onun sözlərinə görə, stadion əvvəlki yerində - Pənahəli xanın imarət kompleksində deyil, şəhərin digər daha böyük, geniş infrastruktura malik yerində inşa ediləcək. Hazırda stadionun layihələndirmə işləri gedir. “Bu idman məhəlləsində tək futbol stadionu deyil, müxtəlif idman yarışları üçün qapalı-açıq idman zalları planlaşdırılır”, - deyə Emin Hüseynov əlavə edib.
