Cari ildə Ağdam rayonunda pambıq yığımı gecikir, həm də məhsuldarlıq ötən illə müqayisədə aşağı düşüb. Bu barədə Sputnik Azərbaycan-a yerli fermerlər söyləyib.
Fermerlərin sözlərinə görə, buna əsas səbəb yay aylarında havaların isti və quraq keçməsidir. Nəticədə yığım dekabr ayının ortasına qədər davam edəcək. Yığım vaxtı havaların soyuq və yağmurlu keçməsi də məhsuldarlığa və məhsulun keyfiyyətinə öz mənfi təsirini göstərəcək.
Fermer Vasif Şahverənov bu il 5 hektar pambıq əkib: “Bu il quraqlıq olduğu üçün məhsuldarlıq bir qədər zəif olub. Hər hektardan hardasa 25-30 sentner məhsul götürmüşük. Keçən il müharibənin o çətin vəziyyətində 30-35 sentner məsul götürmüşdük”.
Fermer Seyfəddin Əliyev isə bildirir ki, pambığa bu il lazımı qədər su verilməyib: “Biz 12 hektar pambıq əkmişdik. Beş dəfə su vurmuşuq. Pambıq təsərrüfatı belədir ki, bu gün suvardıqsa, üç gündən sonra yenidən suvarmaq lazımdır. 12 hektardan cəmi 25 ton pambıq verə bildim”.
Aqronom Damət Sultanov hesab edir ki, pambığın becərilməsində ənənəvi əkin qaydalarından başqa həm də müasir innovativ qaydalardan istifadə etmək lazımdır. Hazırda ölkəyə gətirilən bəzi dərman preparatlarının heç bir mənfi təsiri yoxdur: “Bitkinin aktiv inkişaf dövründə maksimal gübrələrlə və mineral maddələrlə təminatı, onun xarici mühit amilinin təsirlərindən qorunmasına, vitaminlərlə zənginləşməsinə kömək edir. Eyni zamanda bu, bitkinin istilikdən və susuzluq şəraitindən qorunmasına xidmət edir”.
Mütəxəssislər bildirir ki, əslində pambıqçılıqda məhsuldarlığı artıran əsas amillərdən biri də çiyiddir. Əkin vaxtı fermer yüksək məhsuldar pambıq çiyidi səpsə, ilin sonunda məhsul yığımı vaxtı əli boşda qalmaz.
Dövlət Statistika Komitəsinin məlumatına əsasən, 2020-ci ildə Ağdam rayonunda 2120 hektar sahədə pambıq əkilib və nəticədə 7100 ton məhsul yığılıb. Bu da hər hektardan 33,5 sentner məhsuldarlıq deməkdir.
