Abşeron rayonunda narkotikin təsiri altında avtomobil idarə edən şəxslər saxlanılıb. Bu barədə yanvarın 12-də Daxili İşlər Nazirliyindən məlumat verilib.
Rayonun Saray qəsəbəsində “Renault”, İsmayıllı rayonunun Diyallı qəsəbəsində isə “VAZ-21214” markalı avtomobillər daimi postlarda yol hərəkəti qaydalarını pozduqları üçün saxlanılıb.
Sürücülərin narkotik vasitə qəbul etmələri müəyyən edilib. Onlar barəsində inzibati qaydada protokollar tərtib olunub. Məhkəmənin qərarı ilə sürücülərdən biri 6 ay müddətində sürücülük hüququndan məhrum edilib, digəri isə 10 gün müddətinə həbs edilib.
Baş Dövlət Yol Polisi İdarəsinin məlumatına əsasən, 2021-ci ilin 9 ayı ərzində narkotik vasitələrin təsiri altında avtomobil idarə edən 650 sürücü saxlanılıb.
