Azərbaycanın qadın zorakılığına qarşı gördüyü işlər təqdirəlayiqdir. Bunu noyabrın 29-da ABŞ-ın Azərbaycandakı səfiri Erl Litzenberger Gender əsaslı zorakılıqla mübarizə üzrə İlkin yardım tərəflərinin 1-ci Milli Konfransında deyib.
“Azərbaycanda təlimlər vasitəsilə gender əsaslı zorakılığın aradan qaldırılmasının mümkünlüyünə inanırıq. Bu barədə biz də öz töhfəmizi verəcəyik", - deyə diplomat qeyd edib.
Konfransda BMT-nin ölkəmizdəki nümayəndəsi Çaru Bist Azərbaycanda qadın hüquqlarını qorumaq üçün həyata keçirilən tədbirlərdən bəhs edib. O bildirib ki, Azərbaycanın 9 regionunda qadınlar üçün təhlükəsiz məkanlar yaradılıb, 3 mindən çox qadın bu mərkəzlərin üzvü olub.
“400-dən artıq qadına öz iş yerlərini açmaq imkanları yaradılıb. Müxtəlif iş imkanlarının yaradılması istiqamətində təlimlər keçirilib. Cəlilabadda qadınları peşə təlimlərinə cəlb edərək, onların iştirakını 26% artırmışıq”, - BMT rəsmisi vurğulayıb.
Ölkədə 2021-ci ilin 9 ayı ərzində baş verən qəsdən adam öldürmə və adam öldürməyə cəhd cinayətləri nəticəsində 51 qadın həyatını itirib. Xəsarət alanların sayı isə 24 təşkil edib. Statistikaya əsasən, bu il məişət zorakılığı ilə bağlı cinayətlərin sayı əvvəlki illə müqayisədə təxminən 25% artıb. Vətəndaşlar qadına qarşı zorakılıq halları ilə üzləşdikdə Baş Prokurorluğun “961” Çağrı Mərkəzinə müraciət edə bilərlər.
