Azərbaycan Dövlət Reklam Agentliyi tərəfindən açıq məkandakı reklamların həm estetik görünüş, həm də funksionallıq baxımından müasir tələblərə uyğunlaşmaq üçün rəqəmsal reklam daşıyıcılarından istifadə edənlər üçün endirimlər ediləcək. Bu barədə məlumat 6 yanvar tarixində Agentliyin rəsmi səhifəsində yayılıb.
Belə ki, yeni qaydalara əsasən, açıq məkanda elektron daşıyıcılarda reklam yerləşdirilməsinə icazə verilməsi üçün tutulan dövlət rüsumunun dərəcələri 20 kvadratmetrədək olduqda hər kvadratmetrinə görə 50 manat, 50 kvadratmetrədək olduqda 1000 manat + 21-50 kvadratmetrlik hissəsinin hər kvadratmetrinə görə 15 manat, 100 kvadratmetrədək olduqda 1450 manat + 51-100 kvadratmetrlik hissəsinin hər kvadratmetrinə görə 10 manat, 100 kvadratmetrdən artıq olduqda isə 1950 manat + 100 kvadratmetrdən artıq olan hissəsinin hər kvadratmetrinə görə 5 manat təşkil edəcək.
Açıq məkanda elektron daşıyıcılarda reklam yayımına görə 20 kvadratmetrədək olduqda hər kvadratmetrinə görə 12 manat, 50 kvadratmetrədək olduqda 240 manat + 21 – 50 kvadratmetrlik hissəsinin hər kvadratmetrinə görə 9 manat, 100 kvadratmetrədək olduqda 510 manat + 51 – 100 kvadratmetrlik hissəsinin hər kvadratmetrinə görə 7 manat, 100 kvadratmetrdən artıq olduqda isə 860 manat + 100 kvadratmetrdən artıq olan hissəsinin hər kvadratmetrinə görə 5 manat təşkil edəcək.
Bununla bağlı qanunvericiliyə müvafiq dəyişikliklər edilib.
