Məşhur teatr və kino aktyoru Eldar Bağırbəyov bu gün Xaçmaz rayonunun Muxtadır kəndində yıxılaraq bud sümüyü sındırıb. Bu barədə Trend Life-a aktyorun yaxınları məlumat verib.
Məlumata görə, o, Xaçmaza gətirilib, orada rentgen çəkilib. Sonra aktyor Bakıya aparılaraq 3-4 saat narkoz altında əməliyyat olunacaq və o, 12 illik metal dirəklərlə təchiz olunacaq.
Qeyd edək ki, Eldar Bağırbəyov Bakıda anadan olub. Bakı Xoreoqrafiya Məktəbində təhsil alıb. Azərbaycan Dövlət Rus Dram Teatrının aktyorudur. O, 80-ə yaxın rol canlandırıb və 5 dəfə “İlin ən yaxşı aktyoru” mükafatına layiq görülüb.
Bu günlərdə Hacı Zeynalabdin Tağıyev haqqında onun iştirakı ilə çəkilmiş “Tağıyev: Neft” bədii filminin premyerası təqdim olunub.
Xoreoqraf kimi o, həm də şoumen və musiqi ifaçısıdır. 1989-1991-ci illərdə SSRİ Daxili İşlər Nazirliyinin tabeliyindəki Daxili Qoşunlarda sovet ordusu sıralarında dəfələrlə strateji əhəmiyyətli əməliyyatlarda iştirak etmiş, bu əməliyyatlara görə medal və ordenlərlə təltif edilmişdir. O, 1992-ci ildə könüllü olaraq Azərbaycanın ərazi bütövlüyünü müdafiə edib, Qarabağda erməni işğalçılarına qarşı döyüşlərdə iştirak edib. Həmin ilin avqustunda o, yaralandı və bədənində qəlpə var.
