Dekabrın 21-də Bakı Ağır Cinayətlər Məhkəməsində hədə-qorxu ilə tələb etmədə təqsirləndirilən Ata Abdullayevin cinayət işi üzrə məhkəmə prosesi keçirilib.
Ata Abdullayevə verilən ittihamlar məhkəmədə sübuta yetirilib. Prokuror onun 9 il azadlıqdan məhrum edilməsini, cəzasını ümumi rejimli cəzaçəkmə müəssisəsində çəkməsini təklif edib.
O, Cinayət Məcəlləsinin “hədə-qorxu ilə tələb etmə” və “xeyli miqdarda əmlak əldə etmək məqsədi ilə törədildikdə” maddələrilə ittiham edilib.
Ata Abdullayevin vəkili müdafiə nitqinə hazırlaşmaq üçün məhkəmədən vaxt istəyib. Məhkəmə prosesi dekabrın 28-də vəkilin çıxışıyla davam edəcək.
Qeyd edək ki, A. Abdullayev DTX əməkdaşları tərəfindən bu ilin mart ayında saxlanılıb. İttihama əsasən, A. Abdullayev müxtəlif şəxslərdən onlar haqqında rüsvayedici məlumatları yaymaq hədəsi ilə pul tələb edib.
