Azərbaycanda polisə atəş açan narkokuryer saxlanılıb. Bu barədə mayın 2-də Daxili İşlər Nazirliyindən məlumat verilib.
Əməliyyat nəticəsində narkotiklərin qanunsuz dövriyyəsi ilə məşğul olan Vüqar Cəfərov tutulub. Onun bağlamasından 32 kiloqram narkotik götürülüb.
V.Cəfərovla əlbir olan Rövşən Qasımov saxlanılan zaman polislərə müqavimət göstərərək idarə etdiyi “Opel” markalı avtomobillə qaçmağa cəhd edib. Polisə tabe olmayan həmin şəxs üzərində olan odlu silahla polis əməkdaşlarına atəş açıb.
Polislər havaya xəbərdarlıq atəşi açaraq R.Qasımovdan könüllü təslim olmasını tələb ediblər. O, müqavimətə davam etdiyindən və yenidən qaçmağa cəhd göstərdiyindən xidməti silahdan açılan atəş nəticəsində saxlanılıb. R.Qasımova ilkin tibbi yardım edilib və o, xəstəxanaya yerləşdirilib.
Ondan “Makarov” markalı tapança, patronlar və metamfetamin aşkar edilərək götürülüb.
Faktla bağlı cinayət işi başlanılıb, araşdırmalar davam etdirilir.
