Azərbacanla Monqolustan arasında ticarət və iqtisadi əməkdaşlıq haqqında Saziş imzalanıb. Bu barədə 22 oktyabr tarixində İqtisadiyyat Nazirliyinin rəsmi səhifəsi məlumat yayıb.
Sənəd videoformat şəkilində Azərbaycanın iqtisadiyyat naziri Mikayıl Cabbarov və Monqolustanın xarici işlər naziri Battsetseq Batmunxiin tərəfindən imzalanıb. Sənəddə iki ölkə arasında iqtisadiyyatın müxtəlif sahələrində əlaqələrin genişləndirilməsi və yeni əməkdaşlıq imkanlarının araşdırılması nəzərdə tutulur.
Mikayıl Cabbarov Azərbaycanda həyata keçirilən islahatlar, əlverişli biznes və investisiya mühiti, işğaldan azad edilmiş ərazilərimizin yerli və xarici investisiyaların cəlb edilməsi istiqamətində görülən işlər barədə məlumat verib. Monqolustan şirkətləri Azərbaycanda həyata keçirilən layihələrdə iştiraka dəvət edilib.
Monqolustanın xarici işlər naziri ölkəsinin Azərbaycanla əlaqələrin genişlənməsində maraqlı olduğunu bildirib.
Azərbaycanla Monqolustanın 2020-ci ildə ticarət dövriyyəsi 177 min dollar təşkil edib.
