Azərbaycan kibercinayətkarlığa qarşı mübarizə aparan beynəlxalq təşkilatlara 3 erməni hakeri ilə bağlı müraciət edib. Bunu dekabrın 13-də Xüsusi Rabitə və İnformasiya Təhlükəsizliyi Dövlət Xidmətinin idarə rəisi Tural Məmmədov deyib.
Onun sözlərinə əsasən, keçən ilin iyun ayında Fuad Musayev adlı şəxsin adından insanlara məktublar daxil olub: “Bu sahədə müəyyən bilgisi olanlar göndərilən elektron poçt adresinə baxmaqla bunun şübhəli olduğunu anlaya bilər”.
Qurumun rəsmisi qeyd edib ki, təmsil etdiyi dövlət xidməti bu "e-mail"ı kiber hücum olduğunu və hücumun arxasında Ermənistana məxsus “IT Security LLC” (itsec.am) şirkətinin dayandığını müəyyənləşdirib.
“Bu şirkət vasitəsi ilə Armen Qnuni, İran ermənisi Ara Babaxani və Aşot Mnatsakanyanın həmin hücumu Fuad Musayev adı altında həyata keçirdiyini müəyyən etdik. Cinayətə beynəlxalq səviyyədə qiymət verilməsi üçün müvafiq qurumları məlumatlandırmışıq”, - deyə Tural Məmmədov vurğulayıb.
