Azərbaycan gimnastları Daniel Abbasov və Murad Rəfiyevdən ibarət cütlük Bakıdakı dünya çempionatının daha bir akrobatika növündə finala yüksəlib.
Duet balansla hərəkətlərdə təsnifat mərhələsində 27,520 xalla 3-cü olub. Final martın 13-də keçiriləcək.
Daha əvvəl bu cütlük templə hərəkətlərdə 5-ci olub və finalda iştirak hüququ qazanıb.
***
16:01
Azərbaycanı təmsil edən 4 idmançı Bakıdakı akrobatika gimnastikası üzrə dünya çempionatında finala vəsiqə qazanıb.
Ağasif Rəhimov və Raziyə Seyidlidən ibarət duet təsnifat mərhələsində 28,760 xalla 1-ci olub.
Daniel Abbasov və Murad Rəfiyevdən ibarət cütlük isə templə hərəkətlərdə 26,600 xalla 5-ci olub və finalda iştirak hüququ qazanıb. 7 ölkənin mübarizə apardığı növdə ən yaxşı 6 komanda finala yüksəlib.
Qeyd edək ki, bu gün, martın 10-da Bakıda 28-ci akrobatika gimnastikası üzrə dünya çempionatına start verilib. Martın 13-dək davam edəcək çempionat Milli Gimnastika Arenasında keçirilir. Yarışa 17 ölkədən 170 idmançı qatılıb.
