Azərbaycan meyvə və tərəvəzinin Rusiyanın Perm diyarına dəmir yolu ilə sürətli çatdırılması planlaşdırılır. Bunun üçün Permdə malların saxlanılması məqsədilə logistika mərkəzinin tikilməsi də nəzərdə tutulub. Bu haqda 20 dekabrda “Kommersant” xəbər portalı məlumat verib.
Xəbərdə bildirilir ki, layihə üçün yer və investorlar hələ müəyyənləşdirilməyib. Ümumilikdə logistika mərkəzinin tikintisi üçün yatırımın həcmini qimətləndirmək çətindir və bu tədarük həcmidən asılı olacaq.
Məsələ ilə bağlı Perm nümayəndələrinin Bakıya işgüzar səfəri baş tutub. Səfər çərçivəsində əməkdaşlıq istiqamətləri müzakirə edilib. Bu istiqamtlərdən biri “Aqroexpress” layihəsi olub. Sözügedən layihə 2019-cu ildən başlayıb. Onun məqsədi ekspress konteyner qatarlarından istifadə etməklə kənd təsərrüfatı məhsullarını digər ölkələrə çatdırmaqdır. Noyabr ayında imzalanan müqavilə ilə Azərbaycan da bu layihəyə qoşulub.
Hazırda Permdəki əsas topdansatış ərzaq bazarı olan “Prikamye”nin rəhbərliyi tərəfindən ixrac və idxal yüklərinin siyahısı formalaşdırılır. Belə ki, Azərbaycana ağac emalı, maşınqayırma və kimya sənayesi məhsulları, gübrələr, plastik, qablaşdırma materialları və digər məhsullar ixrac oluna bilər. İdxal üçün isə əsas məhsullar məyvə-tərəvəz hesab edilir.
