Rusiya Federasiyası Müdafiə Nazirliyinin 27 mart tarixli açıqlamasında əks olunan məqamlar həqiqətə uyğun deyil. Azərbaycan Ordusunun Fərrux kəndi və ətraf yüksəkliklərdəki mövqelərindən heç bir geri çəkilmə baş verməyib. Bu haqda martın 27-də Müdafiə Nazirliyi (MN) məlumat yayıb.
Məlumatda qeyd olunub ki, ordumuz əməliyyat şəraitinə tam nəzarət edir.
Həmçinin Azərbaycan MN tərəfindən bildirilib ki, atəşkəsin guya Azərbaycan tərəfindən pozulması barədə verilmiş məlumat da həqiqətə uyğun deyil və Azərbaycan hərbçiləri arasında yaralanma halı qeydə alınmayıb.
Açıqlamada Rusiya MN-ə xatırladılıb ki, Azərbaycan ərazisində “Dağlıq Qarabağ” adlı inzibati ərazi vahidi yoxdur. Bu ifadənin işlədilməsi Azərbaycanın beynəlxalq birlik, o cümlədən Rusiya tərəfindən tanınmış və qəbul edilmiş ərazi bütövlüyünə qarşı hörmətsizlikdir.
Eyni zamanda, məlumatda Azərbaycanın Xocalı rayonunda "Furux" adlı kəndin olmaması xüsusi vurğulanıb: “Qeyd edilən kəndin adı "FƏRRUX" dur. Ümid edirik ki, növbəti açıqlamalarda kəndin adı düzgün formada göstəriləcəkdir”.
