Cari ilin fevral ayında Azərbaycanın beynəlxalq hava limanları ümumilikdə 255 min sərnişinə xidmət göstərib. Bu, ötən ilin müvafiq dövrü ilə müqayisədə 2,8 dəfə çoxdur. Bu barədə martın 15-də Heydər Əliyev Beynəlxalq Aeroportundan məlumat verilib.
İlin əvvəlindən bütün aeroportlar üzrə sərnişin axını 546 min nəfər təşkil edib. Bunun 80%-i Heydər Əliyev Beynəlxalq Aeroportunun payına düşüb. AZAL və “Buta Airways” 167 min və 52 min sərnişin daşıyıb ki, bu da müvafiq olaraq xidmət göstərilən sərnişinlərin ümumi payının 38%-ni və 12%-ni təşkil edir.
Sözügedən dövr ərzində 24 xarici aviaşirkət Bakı hava limanına uçuşlar edib. Aviadaşıyıcılar Azərbaycandan Türkiyə, Rusiya, BƏƏ, Gürcüstan, Ukrayna, Belarus, Qətər, İsrail, Almaniya, Böyük Britaniya, Küveyt, Bəhreyn və Səudiyyə Ərəbistanına uçuşlar həyata keçirib.
