2022-ci ilin yanvar-mart ayları ərzində Azərbaycanın ixracı 8 milyard dollar, qeyri-neft sektoru üzrə 727,2 milyon dollar təşkil edib. Bu barədə 6 aprel tarixində İqtisadi İslahatların Təhlili və Kommunikasiya Mərkəzi məlumat verib.
Məlumata əsasən, hesabat dövrü ərzində qeyri-neft sektoru üzrə ixrac ötən illə müqayisədə 225,6 milyon dollar və ya 45% artıb. Bildirilib ki, 2022-ci ilin yanvar-mart ayları ərzində meyvə-tərəvəz məhsulları ötən ilin eyni dövrü ilə müqayisədə 28,5% artıb.
Sözügedən dövr ərzində kimya sənayesi məhsullarının ixracı 10 dəfə, alüminium və ondan hazırlanan məmulatların ixracı 63,9%, pambıq iplik ixracı 29,3%, pambıq lifi ixracı isə 5,6% artıb.
2022-ci ilin mart ayı üzrə ixrac 2 milyard dollar təşkil edib. Bu ilin mart ayı ərzində yeyinti məhsulları üzrə ixrac ötən ilin müvafiq ayı ilə müqayisədə 13,6%, qeyri-yeyinti məhsulları üzrə isə 70,1% artıb.
