Azərbaycan Hökuməti ilə Asiya İnkişaf Bankı (AİB) və Asiya İnfrastruktur İnvestisiya Bankı (AİİB) arasında “COVİD-19-a Aktiv Cavab və Xərcin Dəstəklənməsi Proqramı” üzrə kredit ayrılmasına dair müqavilələr imzalanıb. Bu barədə 10 noyabr tarixində Maliyyə Nazirliyinin rəsmi səhifəsində məlumat yayılıb.
Müqavilələrə əsasən, AİB-dən 250 milyon dollar və AİİB-dən 100 milyon dollar məbləğində kreditlərin 10 il müddətinə LİBOR (London Interbank Offered Rate) üstəgəl 0,5% dərəcəsi ilə cəlb olunması nəzərdə tutulur.
Sözügedən proqramın məqsədi koronavirus pandemiyasının Azərbaycanın iqtisadiyyatına, makroiqtisadi sabitliyə mənfi təsirinin azaldılması ilə bağlı hökumət tərəfindən həyata keçirilən tədbirlər üçün nəzərdə tutulmuş büdcə xərclərinin dəstəklənməsidir.
Qeyd edək ki, LİBOR faizi London banklararası satış faiz nisbətidir. Cari ilin sentyabrın 30-na olan ABŞ dolları üçün 12 aylıq LİBOR faizi 0,24% təşkil edib.
