2022-ci ilin fevral ayında Azərbaycan 229,6 milyon dollarlıq qeyri-neft məhsulları ixrac edib. Bu da ötən ilin fevral ayı ilə müqayisədə 24% çoxdur. Bu barədə 31 mart tarixində İqtisadi İslahatların Təhlili və Kommunikasiya Mərkəzinin dərc etdiyi “İxrac icmalı”nda deyilir.
Məlumata əsasən, qeyri-neft məhsullarının 51,7 milyon dollarlıq hissəsini yeyinti, 177,9 milyon dollarlıq hissəsini isə qeyri-yeyinti məhsulları təşkil edib. Sözügedən məhsullar, əsasən, Türkiyə və Rusiyaya göndərilib. Belə ki, həmin ölkələrə fevral ayında müvafiq olaraq 82,7 milyon dollar və 48 milyon dollarlıq məhsul ixrac edilib. Sonrakı yerlərdə Gürcüstan, İsveçrə və İtaliya qərarlaşıb.
Qeyd edək ki, cari ilin fevral ayında Azərbacan 2,9 milyard dollarlıq məhsul ixrac edib. 2022-ci ilin ilk iki ayı ərzində Azərbaycan Türkiyəyə 153,3 milyon dollar, Rusiyaya isə 119,1 milyon dollarlıq qeyri-neft məhsulları ixrac edib.
