Bakıda keçiriləcək "Formula 1" üzrə Azərbaycan Qran-prisinə biletləri daha çox Türkiyə, Rusiya və Böyük Britaniya vətəndaşları əldə edirlər. Bu haqda martın 10-da Report Bakı Şəhər Halqası Əməliyyat Şirkətinə istinadən məlumat verib.
Həmçinin İspaniya, Hollandiya, Danimarka, Fransa və Norveçdən olan azarkeşlər də yarışmaya böyük maraq göstərirlər.
Azərbaycan Qran-prisinə ilk bileti isə Türkiyə vətəndaşı alıb.
Biletlərin qiyməti yerli azarkeşlərə birgünlük ayaqüstü zonada 90 – 160 manat, üçgünlük tribuna biletləri 280 – 970 manat, uşaqlar üçün (16 yaşadək) isə 190 – 690 manat aralığında dəyişir.
Biletlərin satışı 28 Mall, Gənclik Mall, Heydər Əliyev Sarayının kassalarında, 4 saylı Bakı ASAN xidmət mərkəzində və 1 saylı Sumqayıt regional ASAN xidmət mərkəzində həyata keçirilir.
"Formula 1" üzrə Azərbaycan Qran-prisi iyunun 10-12-si baş tutacaq.
