Azərbaycan vətəndaşlarının İran ərazisindən istifadə etməklə Naxçıvana səfəri üçün qonşu ölkə ilə Anlaşma Memorandumu imzalanacaq. Report-un martın 10-da yaydığı məlumata görə, bunu İranın yollar və şəhərsalma naziri Rüstəm Qasimi bildirib.
O, sabah keçiriləcək Azərbaycan-İran Hökumətlərarası Birgə İqtisadi Əməkdaşlıq Komissiyasının 15-ci iclasında iştirak etmək üçün Bakıya yola düşüb.
“Səfər zamanı ölkələrarası enerji, kənd təsərrüfatı və sənaye sektorlarında əməkdaşlıq müzakirə ediləcək. Azərbaycanda - Neftçala Sənaye Məhəlləsindəki “Iran Khodro”nın fəaliyyətinin genişləndirilməsi razılaşdırılacaq”, - deyə nazir vurğulayıb.
Qeyd edək ki, 2021-ci ildə Azərbaycan və İran arasında ticarət dövriyyəsinin həcmi 400 milyon dollar təşkil edib. Bu göstərici 2020-ci ilə nisbətən 30% artıb.
