Milli Məclisdə müzakirələr zamanı millət vəkili Vüqar Bayramov vətəndaşlara vaxtından əvvəl pensiyaya çıxmaq hüququnun verilməsi barədə təkliflər irəli sürüb. Bu barədə 18 noyabr tarixində millət vəkili öz Facebook səhifəsində məlumat verib.
Vüqar Bayramovun sözlərinə görə, bir sıra vətəndaşlar kifayət qədər yüksək əmək haqqı alır və yüksək pensiya kapitalına malik olur. Lakin həmin kapitaldan istifadə etmək üçün pensiya yaşını (hazırda kişilər 65 yaş, qadınlar 62 yaş 6 ay) gözləməli olur: “Təklifim odur ki, həmin şəxslərə vaxtından əvvəl pensiyaya çıxmaq hüququ verilsin və onların öz kapitallarından daha uzun müddət istifadə etmək imkanları yaradılsın”.
Digər metod isə pensiyada olan ayların sayının azaldılması və artırılması ilə bağlıdır. Bu barədə Əmək və Əhalinin Sosial Müdafiəsi Nazirliyində müzakirələr aparılır.
Millət vəkili bildirir ki, hazırda orta pensiya müddəti kimi 144 ay götürülür. Yəni 12 il x 12 ay = 144 ay. Amma təklif qəbul olunarsa və vətəndaş 65 yaşında yox, 60 yaşında pensiyaya çıxmaq istəyərsə, 144 ayın üzərinə əlavə 5 il = 60 ay hesablanacaq. Beləliklə, pensiya kapitalı 204 aya bölünəcək və aylıq pensiya müəyyənləşəcək.
Xatırladaq ki, Milli Məclisin 17 noyabr tarixində keçirilən iclasında pensiya yaşı barədə müzakirələr aparılıb və millət vəkilləri tərəfindən bəzi təkliflər irəli sürülüb.
