Xarici İşlər Nazirliyi İsraildə törədilmiş terror aktı ilə əlaqədar paylaşım edib. Bu haqda məlumat martın 31-də qurumun Twitter hesabında yerləşdirilib.
Bildirilib ki, Azərbaycan həlak olanların ailələrinə, İsrail hökumətinə və xalqına başsağlığı verir.
“Günahsız insanların həyatına son qoymuş terror hücumlarını şiddətlə pisləyirik. Azərbaycan əvvəllər terrordan əziyyət çəkib və onun bütün forma və təzahürlərini pisləyir”, - deyə tvitdə vurğulanıb.
Sözügedən ölkədə son həftə ərzində üç terror aktı olub. Martın 22-də Beer Şeva şəhərində İŞİD-in bıçaqlı əməliyyatçısının həyata keçirdiyi hücum nəticəsində beş israilli həyatını itirib. Martın 27-də isə Hadera şəhərində odlu silahdan istifadə edilən hücum zamanı iki sərhəd polisi dünyasını dəyişib, 12 israilli yaralanıb.
Sonuncu hadisə martın 29-da paytaxtın yaxınlığındakı Bnei Brak rayonunda qeydə alınıb. Naməlum silahlı şəxsin atəş açması nəticəsində 5 nəfər ölüb.
