Azərbaycanda aqrar sığortanın əhatə etdiyi məhsulların sırası genişləndirilib. Belə ki, sığorta olunan meyvələrin sırasına xurma, ərik, şaftalı, albalı, gilas, alça, gavalı, heyva, alma, armud, çiyələk və nar da əlavə edilib. Bu haqda yanvarın 12-də Kənd Təsərrüfatı Nazirliyinin saytında məlumat verilib.
Aqrar sığorta qaydalarına görə, meyvələr dolu, yanğın, torpaq sürüşməsi, qasırğa, sel və subasma, leysan, ildırım vurması, şaxtavurma, normadan artıq yağan qar yağıntıları, üçüncü şəxslərin hərəkətləri və digər risklərdən sığortalanır.
Bu əkinlərin sığorta haqqının yarısı dövlət tərəfindən ödənilir.
Sözügedən bitkilər həm ölkənin ərzaq təhlükəsizliyi, həm də ixrac potensialının artırılması üçün mühüm əhəmiyyət daşıyır. Bu meyvələr təkcə 2021-ci ildə Azərbaycana 180 milyon dollardan artıq gəlir gətirib.
Aqrar sığorta tarifləri meyvələrin növündən və əkin sahəsinin yerləşdiyi ərazidən, eləcə də seçilən sığorta zərfindən asılı olaraq dəyişir.
Baza zərfi üçün sığorta tarifləri:
1 hektar sahədən gözlənilən məhsuldarlıq miqdarı – 80 sentner, 1 sentner məhsulun bazar qiyməti – 40 manat olarsa, sahədən gözlənilən məhsulun ümumi dəyəri - sığorta məbləği 3 200 manat təşkil edir. Bu sahənin baza zərfi üzrə sığortalanması ölkənin regionlarından asılı olaraq 104- 226 manat arasında dəyişir.
Fermer bu məbləğin yalnız yarısını – 52-113 manatını ödəyir, qalan hissəni dövlət ödəyir.
Sığorta hadisəsi nəticəsində sahədəki məhsul tamamilə itirilərsə, sığorta ödənişi (10% azadolma məbləği olmaqla) 2 880 manat təşkil edir. Qeyd edək ki, azadolma məbləği hadisə nəticəsində hesablanmış zərərin sığortalının üzərində qalan hissəsidir.
