Azərbaycanda cari ilin yanvar-oktyabr aylarında əhalinin sayı 0,3% artaraq noyabr ayının 1-i vəziyyətinə 10 150 713 nəfərə çatıb. Əhalinin 53%-ni şəhər, 47%-ni kənd sakinləri, 49,9%-ni kişilər, 50,1%-ni isə qadınlar təşkil edib. Bu barədə dekabrın 15-də Dövlət Statistika Komitəsi məlumat yayıb.
Bu ilin 10 ayı ərzində 92 150 körpə doğulub. Dünyaya gələn uşaqlar arasında əkizlərin sayı 2 346, üçəmlərin sayı 63, dördəmlərin sayı isə 4 olub.
Həmçinin ölkədə nikah və boşanma hallarının sayı açıqlanıb. Sözügedən dövr ərzində 46 100 nikaha daxilolma və 14 316 boşanma qeydə alınıb. Keçən il bu göstərici müvafiq olaraq 29 580 və 12 347 təşkil edib.
