Azərbaycanda əhalinin məşğulluğunun artırılması üçün Dövlət Məşğulluq Agentliyi tərəfindən bir necə layihələr həyata keçirilir.
Hazırda icra edilən layihələrdən biri Dünya Bankının dəstəyi ilə reallaşdırılan “Azərbaycanda məşğulluğa dəstək” layihəsidir. Sözügedən layihə çərçivəsində bir sıra fəaliyyət istiqamətləri üzrə biznesin qurulması üçün aktivlər təklif edilir. 2020-2025-ci illəri əhatə edəcək layihə üzrə 22 min işsiz şəxsin proqrama cəlb edilməsi nəzərdə tutulub.
Digər layihə "Gənclərin Dayanıqlı Məşğulluğu" proqramıdır. Proqramın əsas məqsədi həssas qrupdan olan gənclərin sosial müdafiəsinin gücləndirilməsi və məşğulluqlarının təmin edilməsidir. Proqram çərçivəsində “Peşəkar Gənclik”, “İşəgötürənlər üçün Əməkhaqqı Subsidiyası” və “Biznesini Yarat Marafonu” layihələri həyata keçirilir.
Həmçinin ölkəmizdə “Azərbaycanda İnnovasiya və Məşğulluğun İnkişafı - PROGRO” adlı layihə mövcuddur. Layihənin hədəfi peşəkar inkişafla bağlı maarifləndirmə, sosial əlaqələrin yaradılması və məşğulluğun artırılmasıdır.
Keçirilən daha bir layihə “Sosial Bağlar-2021” adlanır. Layihə bağçılıq ənənələri olan şəhər və rayonları əhatə edir. İşəgötürmə prosesində aztəminatlı ailələrdən olan namizədlərə üstünlük verilir.
Regionlarda kiçik bizneslərin yaradılmasına dəstək olmaq üçün “Kəndlərdə heyvandarlıq sahəsində ailə biznesinin və özünüməşğulluğun inkişafı” layihəsi icra edilir. Seçilən iştirakçılara biznes təlimlər keçirilir. Təlimi uğurla başa vuran şəxslər damazlıq heyvanlar və avadanlıqlarla təmin edilir. Daha sonra aktivlərlə təmin olunanlara satış bazarlarına çıxmaq üçün köməklik göstərilir.
