Azərbaycanda heyvanların qeydiyyata alınmasına 2021-ci ilin noyabr, dekabr aylarında başlanılacaq. Bu barədə Azərbaycan Qida Təhlükəsizliyi Agentliyinin Heyvan sağlamlığı şöbəsinin müdiri, Respublikanın baş dövlət baytarlıq müfəttişi Qalib Əbdüləliyev sentyabrın 11-də Oxu.az-a məlumat verib.
“Yaradılmış proqram təminatı sınaqdan keçirilən zaman ilkin olaraq heyvanların qeydiyyata alınması Abşeron rayonu, Bakı və Sumqayıt şəhərlərində aparılacaq. İlk mərhələdə iribuynuzlu heyvanların və atların identifikasiyası aparılacaq”, - şöbə müdiri bildirib.
Qalib Əbdüləliyevin sözlərinə görə Azərbaycanda Təxminən 40 min iribuynuzlu heyvanın, 1000-ə yaxın atın qeydiyyatı nəzərdə tutulub. “Ölkəmizdə ümumi olaraq 2,5 milyon iribuynuzlu, 8,6 milyon xırdabuynuzlu heyvan var. İlkin növbədə iribuynuzlu heyvanlar və atların qeydiyyatı aparılacaq. Daha sonra digər heyvanlar qeydiyyata alınacaq”, - baş dövlət baytarlıq müfəttişi əlavə edib. O, həmçinin bildirib ki, 2025-ci ilə kimi ölkənin hər yerində və bütün heyvanlar üzrə prosesin aparılması nəzərdə tutulur.
Agentliyin nümayəndəsi heyvanların identifikasiyası sisteminin əhəmiyyətindən danışarkən bildirib ki, proqram təminatına heyvanın, sahibinin, obyektlərin coğrafi yerləşməsi üçün koordinatların qeydiyyatı və xüsusi olaraq heyvanların üzərində aparılan bütün baytarlıq tədbirləri, vaksinasiyalar, müalicə tədbirləri, laborator müayinələrin nəticələri, ölüm səbəbi kimi məlumatlar daxil ediləcək.
