Milli Məclisin 17 noyabr tarixində keçirilən iclasında deputat Əli Məsimli Azərbaycanda pensiya yaşının azaldılmasını təklif edib.
“Azərbaycanda pensiya yaşının azaldılması vacibdir. Qadınların pensiya yaşının 65-ə çatdırılması dayandırılmalıdır”, - deputat çıxış edərkən deyib. Onun sözlərinə əsasən, orta ömür uzunluğu Azərbaycandan daha çox olan ölkələrdə kişilərin pensiya yaşı 63, qadınların pensiya yaşı isə 60-dır.
Məsələ ilə bağlı digər millət vəkili Siyavuş Novruzov bildirib ki, hər kəsə ümumi standart tətbiq etmək olmaz: “Ağır sahələrdə fəaliyyət göstərən insanların 55 və ya daha aşağı yaşlarda pensiyaya çıxmasına şərait yaradılmalıdır”.
Hazırda Azərbaycanda orta ömür uzunluğu 71,4 yaş təşkil edir. Kişilər 65, qadınlar isə 62,5 yaşına çatdıqdan sonra pensiyaya çıxırlar. 2026-cı ildə ölkəmizdə kişi və qadınların pensiya yaşının bərabərləşərək 65 yaş olması nəzərdə tutulub.
