Ölkədə bir neçə gün əvvəl bir kiloqramı 1 manata satışa çıxarılan pomidor hazırda 3 manata təklif olunur. Qiymətin artması ilə bağlı 2 oktyabr tarixində Report araşdırma aparıb.
“Bu il örtülü təsərrüfatlarda pomidor istehsal edən sahibkarlar ciddi ziyana məruz qalıb. İndi onların əksəriyyətinin toxum, ştil almağa imkanları yoxdur”, - deyə aqrar sahə üzrə ekspert Vahid Məhərrəmov bildirib. Onun sözlərinə görə, bu il Rusiya tərəfindən pomidor ixracına maneələr yaradıldığı üçün pomidor istehsalçıları ciddi maddi ziyana məruz qalıb.
Ekspert pomidor yetişdirən Şəmkir sahibkarlarından da danışıb: “İstixanalarda pomidor yetişdirən fermerlər əsaslı gəlirdən məhrum olublar. Onların Rusiyaya ixrac etdikləri məhsulun bir hissəsi sərhəddə, bir hissəsi yolda, bir hissəsi də bazarlarda xarab olub. Sahibkarların bir çoxu bu səbəbdən həvəsdən düşüb. Buna görə də pomidorun qiyməti artmaqda davam edəcək”.
İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətindən bazarlarda pomidorun süni qiymət artımının olub-olmamasına dair rəy bildirilib: “Pomidorun qiyməti dövlət tərəfindən tənzimlənmədiyi üçün, bazar iqtisadiyyatı şəraitində rəqabət mühitində, tələb-təklif əsasında formalaşır”.
Azərbaycan 2021-ci ilin yanvar-avqust aylarında 128 milyon dollarlıq pomidor ixrac edib.
