Oktyabrın 11-də xarici işlər naziri Ceyhun Bayramov Belqradda sebiyalı həmkarı Nikola Selakoviç ilə görüşüb. Bu barədə Xarici İşlər Nazirliyindən məlumat verilib.
Görüş Qoşulmama Hərəkatının 60 illik yubiley tədbiri çərçivəsində baş tutub. Nazirlər tərəfindən ikitərəfli əməkdaşlığı genişləndirmək məqsədilə üç sənəd imzalanıb:
- “Azərbaycan və Serbiya arasında ümumvətəndaş pasportlara malik şəxslər üçün viza tələbinin qarşılıqlı aradan qaldırılması haqqında saziş”;
- “Azərbaycan XİN ilə Serbiya XİN arasında siyasi məsləhətləşmələr haqqında anlaşma memorandumu”;
- “Azərbaycan XİN ilə Serbiya XİN arasında konsulluq sahəsində əməkdaşlıq haqqında anlaşma memorandumu”.
Azərbaycan Prezidenti İlham Əliyev Qoşulmama Hərəkatının toplantısında videoformatda çıxış edib. Ölkə başçısı təşkilatın əhəmiyyətindən danışıb. İlham Əliyev 44 günlük Vətən müharibəsi nəticəsində Azərbaycan ərazi bütövlüyünü bərpa etdiyini də vurğulayıb.
Qoşulmama Hərəkatı özlərinin formal olaraq heç bir hərbi bloka tərəf olmadığını bildirmiş 120 dövlətin üzv olduğu beynəlxalq təşkilatdır. Azərbaycan 2011-ci ildən Qoşulmama Hərəkatının üzvüdür.
