Azad edilmiş ərazilərdə 140 MVt-a qədər gücü olan 33 kiçik su elektrik stasnsiyasının bərpası aparılacaq. Bu barədə energetika naziri Pərviz Şahbazov “Energetiklər Günü”nə həsr edilmiş “Respublika” qəzetində dərc olunan məqaləsində bildirir.
Məqalədə qeyd olunur ki, azad edilmiş ərazilərdə elektrik şəbəkənin qurulması ilə əlaqədar tikintisi və bərpa olunması planlaşdırılan 11 yarımstansiyanın artıq 5-i istismara verilib, "Qubadlı", "Zəngilan" “Ağdam-1” və “Ağdam-2” yarımstansiyalarının tikintisi və Daşkəsən yarımstansiyasının yenidənqurulması ilin sonuna qədər başa çatdırılacaqdır. Laçın rayonunun Qoşasu kəndində yerləşən yarımstansiyanın layihələndirilməsi işləri görülür. Artıq həmin ərazilərdə 300 km-ə yaxın müxtəlif gərginlikli hava və kabel xətləri çəkilib, bərpa edilib, transformatorlar quraşdırılıb.
Qarabağda “Yaşıl Enerji Zonası”nın yaradılması məqsədilə Yaponiyanın TEPSCO şirkəti ilə əməkdaşlığa başlanılıb. Bu bölgələr 7200 MVt günəş, 2000 MVt külək enerjisi potensialına malikdir. Ölkəmizin daxili su ehtiyatlarının isə, təxminən, 25%-i, yəni illik 2 milyard 560 milyon kubmetri bu ərazilərdə formalaşır. Əlavə olaraq Zəngilan/Cəbrayıl rayonlarının ərazisində 240 meqavatlıq Günəş Elektrik Stansiyası layihəsinin reallaşdırılması üzrə BP ilə razılaşma əldə edilib. Hazırda bu stansiyanın inşasının texniki-iqtisadi aspektləri müzakirə edilir.
Nazirin sözlərinə görə, hədəf ölkənin ümumi enerji istehsalı gücündə bərpa olunan enerjinin payını hazırkı 17,3%-dən 2025-ci ildə 24%-ə, 2030-cu ildə isə 30%-ə çatdırmaqdır.
Hazırda Azərbaycanın ümumi elektrik enerjisi istehsalı gücü 7538,4 MVt təşkil edir. Elektroenergetika sistemində 18 istilik elektrik stansiyası, 25 su elektrik stansiyası, bərk məişət tullantıları elektrik stansiyası, 4 külək elektrik stansiyası, 8 günəş elektrik stansiyası və 3 hibrid (günəş, külək və bioqaz) elektrik stansiyası fəaliyyət göstərir. Respublikada elektrik enerjisi şəbəkəsində hazırda 218 yarımstansiya istismardadır.
