Kiçik və Orta Biznesin İnkişafı Agentliyinə (KOBİA) azad edilmiş ərazilərdə bərpa işlərində iştirak üçün yerli və xarici şirkətlərdən 900-ə yaxın müraciət daxil olub. Bu haqda Agentliyin İdarə Heyətinin sədri Orxan Məmmədov Trend-ə olan müsahibəsində bildirib.
Orxan Məmmədov məlumat verib ki, Qarabağda infrastruktur layihələrində artıq Türkiyə şirkətləri iştirak edir: “Onlar iri infrastruktur layihələrinin reallaşdırılmasında uğurla çalışır. Agentliyimiz müntəzəm olaraq xarici şirkətləri və investorları Azərbaycandakı potensial və iştirak imkanları barədə məlumatlandırır”.
"Agentliyimizin Rusiya şirkətləri ilə B2B görüşləri "ağıllı şəhər" inkişafına həsr olunmuşdu. Bundan başqa, Azərbaycana "KamAZ", "RJD Logistika" və digər şirkətlər səfər edib. Həmçinin logistika sahəsində olan "Aqroekspress" layihəsinin işə salınması üçün hazırlıq işləri aparılır”, - deyə sədr əlavə edib.
Orxan Məmmədov KOBİA və Rusiya İxrac Mərkəzi arasında imzalanmış anlaşma memorandumundan danışarkən bildirib ki, Rusiya ilə əməkdaşlıq edən azərbaycanlı sahibkarlara güzəştli maliyyə dəstəyi veriləcək.
