“Azərbaycan Hava Yolları” QSC-nin prezidenti Samir Rzayev ilə İtaliyanın Azərbaycandakı səfiri Luka Di Canfrançesko arasında görüş keçirilib.
İnsanoid.com xəbər verir ki, görüşdə iki ölkə arasında hava nəqliyyatı sahəsində əməkdaşlığın gücləndirilməsi, yeni marşrutların açılması və qarşılıqlı turizm, iqtisadi və mədəni əlaqələrin inkişafı məsələləri müzakirə olunub.
AZAL prezidenti bildirib ki, 1 apreldən Bakı-Milan reyslərinin sayı artırılıb və 13 maydan etibarən bu istiqamətdə gündəlik uçuşlar həyata keçiriləcək. Səfir Di Canfrançesko isə 2026-cı ildə İtaliyada baş tutacaq Qış Olimpiya Oyunları fonunda birbaşa uçuşların əhəmiyyətini xüsusi vurğulayıb.
2024-cü ildə AZAL bu marşrut üzrə 252 reys yerinə yetirərək 67 708 sərnişin daşıyıb. Təkcə 2025-ci ilin ilk rübündə isə 67 reyslə 15 236 sərnişin daşınıb. Görüş zamanı tərəflər regional inteqrasiya və ortaq təşəbbüslərlə bağlı da fikir mübadiləsi aparıblar.
