Azərbaycanın kişi və qadınlardan ibarət komandaları Avropa Həndbol Federasiyası (EHF) kubokunda iştirak edəcəklər.
Bu barədə İnsanoid bu gün, 6 sentyabr tarixində Azərbaycan Həndbol Federasiyasına istinadən xəbər verir.
Qadınlardan ibarət komandaların oyunlarının vaxtı və məkanı müəyyənləşib.
Yarışa 1/32 final mərhələsindən qatılacaq “Azəryol” Bosniya və Hersoqovinanın “ZRK Krivaja” komandası ilə 30 sentyabr – 1 oktyabr tarixlərində rəqib meydanında qarşılaşacaq.
Eyni tarixlərdə “Qarabağ” İspaniyanın “KH-7 BM Granollers” kollektivi ilə səfərdə üz-üzə gələcək. “Kür”ün İtaliyanın “Jomi Salerno” komandası ilə oyunu isə 23-24 sentyabrda Mingəçevirdəki “Kür” Olimpiya İdman Mərkəzində baş tutacaq.
İki oyunun nəticəsinə görə üstünlük qazanan komanda növbəti mərhələyə adlayacaq.
Kişilərdən ibarət “Azəryol” I mərhələnin “Amber” (Litva) – “Brixen” (İtaliya) cütünün qalibinə rəqib olacaq. “Kür” isə Xorvatiyanın “MRK Sesvete” kollektivi ilə mübarizə aparacaq. İlk oyunlar oktyabrın 14-15-də, cavab matçları oktyabrın 21-22-də baş tutacaq.
