Azərbaycanda yaxın iki ildə 500-dən çox “Ağıllı poçt” terminalının - “Kargomat”ın istehsalı və quraşdırılması nəzərdə tutulur. Bu barədə 16 may tarixində Kiçik və Orta Biznesin İnkişafı Agentliyi məlumat verib.
“Kargomat” tam avtomatlaşdırılmış poçt qutularından ibarət terminaldır. Bu terminallar vasitəsilə bağlamaları 7/24 rejimində növbə gözləmədən, təhvil nöqtələrinin və kuryerlərin iş qrafikindən asılı olmadan əldə etmək mümkündür. Bildirilib ki, “Kargomat” terminalları sensor ekran, POS terminal, QR kod və barkod skanerlər, videomüşahidə kameraları və elektron qıfıllarla təchiz olunub.
Belə ki, alıcı onlayn mağazada məhsulu sifariş etdikdən sonra çatdırılma üsulu kimi özünə ən yaxın olan “Kargomat” terminalını seçir. Bağlama qeyd olunmuş “Kargomat”a çatdırıldıqda istifadəçi SMS vasitəsilə bildiriş alır. 3 gün ərzində bildirişdə qeyd olunan kodu daxil etməklə bağlamanı əldə etmək mümkündür.
Məlumata əsasən, hazırda terminalların Türkiyədə qurulması ilə bağlı danışıqlar aparılır.
