Azərbaycanın iş adamlarına Pakistanın Xaybər-Paytunxva vilayətinin müxtəlif sahələrinə investisiya yatırmaq imkanları təklif edilib. Report xəbər verib ki, bu barədə 27 aprel tarixində Azərbaycanın Pakistandakı səfiri Xəzər Fərhadovla görüşdə bu ölkənin Sərhəd Ticarət-Sənaye Palatasının prezidenti Hasnain Xurşid Əhməd bildirib.
Onun sözlərinə görə, xarici investorlar üçün neft, qaz, mədən, faydalı qazıntılar, elektroenergetika, mebel istehsalı, yarımqiymətli daş-qaşlar, həmçinin əl işi istehsalı olan məhsullar kimi sektorlar təklif edilir. Palata sədri əlavə edib ki, ölkənin bu vilayəti investisiya və biznes üçün təhlükəsiz və cəlbedicidir.
Azərbaycanın Pakistandakı səfiri Xəzər Fərhadov isə xaybər-paytunxvalı iş adamlarını Azərbaycanda potensial sənaye sahələrinə sərmayə qoymağa dəvət edib.
