Bakı Ali Neft Məktəbinin 5-ci kurs tələbəsi Xəqan Kərimov ABŞ-ın Yuta Universitetinin doktorantura pilləsinə qəbul alıb. O, həmçinin universitetdən illik 122 320 dollar məbləğində təqaüd qazanıb. Bu barədə aprelin 28-də Bakı Ali Neft Məktəbi xəbər paylaşıb.
Proseslərin avtomatlaşdırılması mühəndisliyi ixtisasının V kurs tələbəsi olan gənc ABŞ-ın iki universitetindən tam təqaüdlə qəbul alıb. X.Kərimov Yuta Universitetində 122 320 dollar təqaüdlə “Kompüter elmləri” ixtisasının kibertəhlükəsizlik istiqaməti üzrə təhsilini davam etdirəcək.
Tələbə Bakı Ali Neft Məktəbinə 2017-ci ildə 695 balla daxil olub. Həmçinin o, İrlandiyanın “Cyrex” şirkətində Sızma/nüfuzetmə mütəxəssisi kimi çalışır.
