"AzerGold” QSC-nin strateji planına əsasən, yeni “Greenfield” layihələri ilə yanaşı, bu ildən 2029-cu ilədək 10 yatağın istismara verilməsi nəzərdə tutulur. Bu barədə 17 mart tarixində Report cəmiyyətin İdarə Heyətinin sədr müavini Xəyyam Fərzəliyevə istinadən məlumat verib.
Məlumata əsasən, istismara verilməsi planlaşdırılan yataqlardan 4-ü qızıl, 1-i polimetal, 3-ü mis, 2-si dəmir filizi yatağıdır.
Onun sözlərinə görə, "AzerGold” fəaliyyət dövrü ərzində 287 min unsiya qızıl, 530 min unsiya gümüşün beynəlxalq bazara ixracına nail olub. Bundan əlavə, sədr bildirib ki, 5 ildən bir qədər çox olan dövrdə qiymətli metalların satışından ölkə iqtisadiyyatına 757 milyon manata yaxın vəsait cəlb edilib.
Ötən il Daşkəsən rayonunda “Nərimanlı” potensial qızıl yatağı kəşf edilib. Hazırda sözügedən sahə üzrə müvafiq geoloji tədqiqatlar davam etdirilir", - deyə Xəyyam Fərzəliyev əlavə edib.
“AzerGold” QSC 2015-ci ildən fəaliyyət göstərir. Hal-hazırda Çovdar qrupuna aid “Çovdar”, “Ağyoxuş” və “Mərəh” yataqlarında hasilat işləri aparır.
