Pilotların eniş zamanı küləyin istiqamətini və sürətini nəzərə almayaraq helikopterin istismar qaydalarına zidd olaraq idarəetmədə yol verdikləri kobud səhvlər qəzaya səbəb olub. Bu barədə məlumat dekabrın 20-də Baş Prokurorluğun keçirdiyi brifinqdə verilib.
Qəza baş verən gün helikopterin uçuşu və təlimlərə cəlb edilməsi ilə bağlı hər hansı qanun pozuntusu müəyyən edilməyib.
Qeyd olunub ki, qəza nəticəsində həlak olmuş şəxslərin ölüm səbəbi bədən xəsarətləri alması nəticəsində yaranmış travmatik şok olub. Helikopterin zərbə ilə yerə dəyməsi səbəbindən helikopterin sol qapısı və alın şüşəsi yerindən çıxıb, içərisində olan şəxslərdən 4 nəfər çölə atılıb. Onlardan 2-i aldıqları xəsarətlərin ağırlığından hadisə yerində ölüb, digər 2-i isə yaralanıb.
“Qara qutu” Azərbaycan və Çex Prokurorluqları tərəfindən açılıb, uçuşa hazırlıq prosesindən qəza baş verən ana qədər olan bütün məlumatlar, o cümlədən səs yazıları Azərbaycan tərəfinə təqdim edilib.
DSX-nin hərbi helikopteri noyabrın 30-da Xızı rayonu ərazisində yerləşən “Qaraheybət” aviasiya poliqonunda təlim uçuşları yerinə yetirərkən qəzaya uğrayıb. Nəticədə 14 nəfər şəhid olub, 2 nəfər yaralanıb.
