Bakıda 18 il əvvəl qətl törətməkdə təqsirləndirilən şəxsin cinayət işi üzrə məhkəmənin hazırlıq iclası başlayıb. Bu barədə 10 mart tarixində Report məlumat verib.
Məlumata əsasən, hadisə 2003-cü ilin dekabrında paytaxtın Suraxanı rayonunda qeydə alınıb.
Belə ki, təqsirləndirilən şəxs və onun tanışı 2003-cü ilin dekabrın 19-da “Fəvvarələr meydanı” adlanan ərazidə gəzərkən pul qazanmaq məqsədilə taksi sürücüsünü oğurlamaq qərarına gəliblər. Onlar “QAZ-24” markalı avtomobilin taksi sürücüsünü Əmircan qəsəbəsinə sürdürərək ona bədən xəsarətləri yetirməklə pulunu ələ keçiriblər. Sonra isə zərərçəkən şəxsin yoldaşına zəng edərək ərini oğurladıqlarını bildiriblər və sərbəst buraxılması müqabilində pul tələb ediblər. Lakin bir müddət sonra onlar sürücünü boğaraq öldürüblər.
2021-ci ildə cinayətdə təqsirləndirilən şəxsə Cinayət Məcəlləsinin maddələrilə ittiham elan olunub və barəsində məhkəmənin qərarı ilə həbs qətimkan tədbiri seçilib.
Cinayətin digər iştirakçısı vəfat etdiyinə görə, onun cinayət işi üzrə icraata xitam verilib.
