Bakıda həyat yoldaşını qətlə yetirməkdə təqsirləndirilən Füzuli Qarayevin cinayət işi üzrə məhkəmə prosesində zərərçəkmişlər dindirilib. Bu haqda 10 mart tarixində Report məlumat yayıb.
Prosesdə Sevinc Məhərrəmovanın valideynləri ifadələrində bildiriblər ki, qızları hadisədən əvvəl də döyülürdü və ölümlə hədələnirdi: “O, qızımı təhdid edirdi ki, evə gəlməsən, uşaqları öldürəcəm”.
Onlar mərhumun qadın sığınacağına müraciət etməsi barədə heç bir məlumatları olmadıqlarını deyiblər. F.Qarayev isə ona qarşı səsləndirilən ittihamlarla razılaşmayıb.
Bundan əvvəlki prosesdə təqsirləndirilən şəxs ifadəsində ailəsində yaşanan problemlərə görə feministləri günahlandırıb. Məhkəmənin növbəti iclası martın 29-na təyin edilib.
Qeyd edək ki, insident 2021-ci il avqustun 3-də Xəzər rayonu, Zirə qəsəbəsi ərazisində baş verib. 24 yaşlı Sevinc Məhərrəmova əri tərəfindən döyülüb və çoxsaylı bıçaq zərbələri nəticəsində öldürülüb.
