Bakıda 75 yaşlı qadını döyən baxıcıya cinayət işi açılıb. Bu barədə dekabrın 17-də Baş Prokurorluq məlumat yayıb.
“Xəzər Xəbər”də ağır xəstə olan Zemfira Musayevaya ona qulluq edən şəxs tərəfindən zorakılıq edilməsini əks etdirən videogörüntülər yayılıb. Hadisə paytaxtın Pirallahı qəsəbəsində baş verib.
Aparılan araşdırmalarla müəyyən edilib ki, baxıcı Sona Axundova mütəmadi olaraq xəstə qadını döyərək və sair zorakı hərəkətlərlə əzab verərək ona çoxsaylı bədən xəsarətləri yetirib.
Yoxlama zamanı zərərçəkmişin qızı Sevinc Quliyeva anasının baxıcısı tərəfindən döyülməsini əks etdirən görüntüləri də təqdim edib.
Faktla bağlı “əzab vermə” maddəsi ilə cinayət işi başlanılıb. Baxıcını 2 ilədək azadlıqdan məhrum etmə cəzası gözləyir.
