Bakıda Ağıllı Mobillik Laboratoriyası (Smart Mobility Lab) yaradılacaq. Bununla bağlı dekabrın 25-də Bakı Nəqliyyat Agentliyi və İsveçrənin Lozanna Federal Texnologiya İnstitutunun Böyük Şəhər Sistemlərinin İnnovativ İdarəçiliyi proqramı (IGLUS) arasında memorandum imzalanıb.
Memorandumun məqsədi Bakıda ictimai nəqliyyat, şəhər mobilliyi və ağıllı şəhər infrastruktur sistemlərinin inkişafı sahəsində yerli mütəxəssislərin yetişdirilməsidir.
“Laboratoriya nəqliyyat sahəsində oxuyan gənc kadrların yetişdirilməsi, həmçinin əməkdaşların potensialının artırılması üçün mühüm rol oynayacaq”, - deyə Agentlikdən bildirilib.
IGLUS proqramı nəqliyyat, enerji, su, kanalizasiya və binalar kimi infrastrukturları, həmçinin idarəetmə, maliyyələşdirmə, özəl sektorun iştirakı, rəqəmsallaşdırma kimi mövzuları əhatə edir. Bu proqram hazırda Avropa, Amerika, Afrika və Asiyada müxtəlif universitetlərlə əməkdaşlıq edir.
