Bugün, noyabrın 15-də Bakı Konqres Mərkəzində 25-ci Beynəlxalq Biznes Forum öz işinə başlayıb. Bu barədə İqtisadiyyat Nazirliyi öz səhifəsində məlumat yayıb.
Forumun açılışında çıxış edən iqtisadiyyat naziri Mikayıl Cabbarovun sözlərinə görə, hazırda Azərbaycanın strateji valyuta ehtiyatları 52 milyard dollardan çoxdur və bu rəqəm ölkənin xarici borcunu 6 dəfədən çox üstələyir.
“Bu ilin yanvar-sentyabr aylarında ÜDM 4,8%, qeyri-neft sektorunda isə 6,2% artıb. ÜDM-də qeyri-neft sektorunun payı 64% təşkil edib”, - deyə nazir bildirib.
Mikayıl Cabbarovun dediyinə görə, cari ilin ilk 9 ayında qeyri-neft ixracı 41%-dək artıb, bu da indiyədək müşahidə olunan ən yüksək göstəricidir.
Türkiyə Respublikasının xəzinə və maliyyə nazirinin müavini Nureddin Nebati öz çıxışında bildirib ki, Azərbaycanın işğaldan azad edilmiş ərazilərində görülən işlərdə Türkiyə şirkətləri fəal iştirak edir. Nazir müavini Türkiyə və Azərbaycan arasında ticarət dövriyyəsinin 15 milyard dollara çatdırılması hədəflərindən danışıb.
Qeyd edək ki, forum noyabrın 17-dək davam edəcək. Tədbirdə 30-a yaxın ölkədən nümayəndələr iştirak edir. Forum zamanı, həmçinin iş adamları arasında ikitərəfli görüşlər keçiriləcək, xarici iş adamları və investorlar bir sıra müəssisələrdə istehsal prosesi ilə tanış olacaq, yerli sahibkarlarla əməkdaşlıq imkanlarına dair müzakirələr aparacaqlar.
