Gecələri şən keçirmək üçün Bakıda onlarla fərqli və hər zövqə uyğun məkan fəaliyyət göstərir. Bu məkanlarda doyunca rəqs etmək, müxtəlif janrlarda musiqilər dinləmək, dadlı yeməklərdən və içkilərdən zövq almaq olar. İnsanoid paytaxtda gecə harada əylənə biləcəyiniz yerlərin siyahısını təqdim edir.
“Madrid Bar” restoranı Dənizkənarı Bulvarda yerləşir. Avropa stilində olan məkanda cümə və şənbə günləri DJ musiqisi olur. Şənbə günü depozit mövcuddur - 1 nəfərə 50 manat.
Nəsimi rayonu, Səməd Vurğun 25 ünvanındakı “Yüngül cinayətlər” restoranı öz dizaynı ilə seçilir. Burada maraqlı şəkillər çəkdirmək üçün müxtəlif yerlər var. Məkanın adındakı əsas ironiya ondan ibarətdir ki, restoran Bakı Ağır Cinayətlər Məhkəməsinin düz qarşısında yerləşir. DJ perfomansı olan cümə, şənbə və bazar günlərində bir nəfər üçün depozit məbləği 50 manatdır. Qeyd edək ki, həftəsonu üçün çərşənbədən masa rezerv etmək lazımdır.
Neftçilər Prospekti 34 ünvanında yerləşən dəniz mənzərəli “Pasifico” restoranı cümə-bazar günləri saat 20:00-dan sonra kluba çevrilir. Həmin günlər burada adambaşı depozit 50 manatdır. Məkanın qaydalarına əsasən, xanımsız giriş qadağandır.
“62 ChillOut” restoranı Fəvvarələr meydanı yaxınlığında yerləşir. DJ musiqisinin müşayiəti ilə burada çərşənbə-bazar günləri vaxt keçirə bilərsiz. Lakin klub ab-havası cümə və şənbə günləri olur. Bu günlər depozit 50 manat təşkil edir.
“UNBAR” modern konseptdə dizayn edilmiş köhnə dəyirman binasının içində yerləşir. Girişdə “Dəyirmanlar Kralı” kimi ad çıxarmış Ağabala Quliyevin portreti var. Bu heç də təsadüfi deyil — o, 1906-cı ildə sözügedən binanı alıb və bura uzun müddət dəyirman kimi fəaliyyət göstərib. Məkanın hazırkı adı isə məhz bu konseptlə uyğunlaşdırılıb. Belə ki, o, həm “Un bar”, həm də “anbar” kimi oxuna bilər. Burada depozit yalnız şənbə günləri tələb edilir. Yuxarıda adıçəkilən məkanlardan fərqli olaraq, “UNBAR”da gecə əylənmək üçün bir nəfərə 100 manat depozit ödəmək lazımdır.
