Təmizlik şirkətləri ticarət və yaşayış sektorları tərəfindən tələb olunan geniş bir xidmətdir. İşdən baxımlı, təmizlənmiş və ləkəsiz pəncərə şüşələri olan evə qayıtmaq istəyənlər bu xidmətlərdən istifadə edə bilər. Bəs ev təmizliyi sizə neçəyə başa gələcək? İnsanoid bunu öyrənmək üçün araşdırma aparıb.
“Təmiz ev” şirkətinə müraciət etsəniz, 100 kvadratmetr sahəsi olan evin təmizliyi sizə 145 manata başa gələcək. Lakin mənzil təzə təmirdən çıxıbsa, bu qiymət 279 manat təşkil edəcək. Qeyd edək ki, cambalkonların təmizlənməsi bu qiymətə daxil deyil.
“Clean.az”-da qiymətlər xadimənin iş saatlarından asılıdır. Belə ki, bir xadimə evinizdə 3 saat çalışarsa, qiymət 60 manat, 3 saatdan çox işləsə, 80 manat olacaq.
“Abbasoğlu” təmizlik xidməti mənzilin bir kvadratmetrini 1,50 manata təmizləyir. Yeni təmir olunan evin bir kvadratmetrini isə 2,00 manata. Verilən məlumata görə, bu qiymət evə baxış keçirildikdən sonra dəyişə bilər.
“188 Təmizlik”də qiymətlər adıçəkilən şirkətlərdən fərqlənir. Burada yaşayış olan evin bir kvadrat metrinin təmizlənməsi 2,50 manata, təzəlikcə təmir edilən mənzilin isə 3,00 manatadır. Əsaslı təmizlik xidmətinə otaq, dəhliz, zalın, mətbəxin, hamam otaqlarının, divarların, məişət texnikalarının, pəncərələrin təmizlənməsi, tullantıların atılması daxildir.
“166 Təmizlik Xidməti” hər büdcəyə uyğun müxtəlif təmizlik paketlərini təqdim edir:
[gallery columns="1" link="file" size="full" ids="22242"]
Həmçinin burada saatlıq təmizlik paketləri mövcuddur. 4 saatlıq təmizliyin qiyməti həftədə bir dəfə 60 manat, 2 dəfə 110 manat, 3 dəfə isə 150 manatdır. 8 saatlıq təmizliyin qiyməti isə müvafiq olaraq 80, 150 və 210 təşkil edir. Hər əlavə saata görə 10 manat hesablanacaq.
Qeyd edək ki, sözügedən şirkətlərdə təmizlik zamanı bütün vasitə və təmizləyici maddələr qiymətə daxildir.
